Bækur 2006
 

		Biblían á 100 mínútum. Þýð.: Jakob F. Ásgeirsson. Allir þekkja Biblíuna, bók bókanna. En alltof fáir hafa lesið í henni, hvað þá lesið hana spjaldanna á milli. Biblían á 100 mínútum geymir frásagnir Biblíunnar í hnotskurn – frá Mósebókunum til Opinberunarbókarinnar. Biblían í þessum nýja búningi tekur einungis um 100 mínútur í lestri – og er því tilvalin í ferðalagið eða upplýsandi kvöldlestur. Biskup Íslands, herra Karl Sigurbjörnsson, skrifar formála að bókinni og kemst þar m.a. svo að orði: „Ég fagna útkomu Biblíunnar á 100 mínútum. [Hún] er skemmtilegt og handhægt yfirlit ... [og] gefur glögga innsýn í meginstef Biblíunnar og handhægan leiðarþráð til að rata gegnum hana.“ 64 bls. 990 kr. Panta.
		Bla bla. Colting & Gadd. Meira en 600 bráðfyndnar, stórfurðulegar og gagnslausar staðreyndir til að segja frá þegar maður hefur ekkert til að tala um. Bla bla kemur til bjargar þegar þið hafið ekki hugmynd um hvað þið eigið að segja – í partíum, við matborðið eða meðal vina. Núna getið þið slegið í gegn með mögnuðum fróðleik og fyndnum athugasemdum! Marylyn Monroe var með sex tær á vinstri fæti. Þú átt sama afmælisdag og níu milljónirr annarra. Það er ekki hægt að hnerra með augun opin. Ef kalkúnn lítur upp með munninn opinn í rigningu gæti hann átt á hættu að drukkna. 1.490 kr. (kilja). Panta.
		Borgarstjórinn í Casterbridge. Thomas Hardy. Þýð.: Atli Magnússon. Borgarstjórinn í Casterbridge er ein af ágætustu sögum enska skáldjöfursins Thomasar Hardys. Sagan gerist á æskuslóðum höfundar í Dorchester á Englandi (sem er Casterbridge í sögunni). Atvinnulaus landbúnaðarverkamaður, Mikael Henchard, selur í ölæði konu sína og dóttur ókunnum sjómanni á sveitamarkaði. Í iðrun og örvæntingu hefur hann árangurslausa leit að konunni og barninu og gengur í 21 árs bindindi. Að átján árum liðnum hefur vegur hans vaxið svo að hann er orðinn borgarstjóri í Casterbridge, voldugur kaupmaður og mikils metinn. En fortíðin hvílir á honum eins og mara – og dag einn ... Stórbrotið verk um mikil örlög – mannlegan breiskleika og styrk, örvilnun og hamingju, ástir og afbrýði, sjálfselsku og veglyndi. Eitt af meistaraverkum heimsbókmenntanna – í vandaðri þýðingu Atla Magnússonar. 390 bls. 2.490 kr. Panta.
		Fjölmiðlar 2005. Ólafur Teitur Guðnason. Áhrif fjölmiðla eru mikil, en lengst af hafa þeir búið við lítið sem ekkert faglegt aðhald. Á þessu varð markverð breyting í upphafi árs 2004 þegar Ólafur Teitur Guðnason hóf að skrifa vikulega fjölmiðlapistla í Viðskiptablaðið. Pistlar Ólafs eru snarpir og beinskeyttir og hafa vakið mikla athygli, enda hefur höfundurinn verið óhræddur við að taka kollega sína á beinið. Í fyrra kom út bókin Fjölmiðlar 2004 þar sem öllum fjölmiðlapistlum Ólafs Teits árið 2004 var safnað saman. Svo mjög fór gagnrýni Ólafs Teits fyrir brjóstið á íslenskri blaðamannastétt að enginn ritdómur birtist um bókina í hinum hefðbundnu fjölmiðlum. Fjölmiðlapistlar Ólafs koma nú út á bók annað árið í röð. Bókin Fjölmiðlar 2005 geymir alla fjölmiðlapistla Ólafs Teits árið 2005 og er óhætt að segja að hún bregði upp einstakri mynd af blaðamennsku á Íslandi á viðburðaríku ári. Í bókinni eru rakin ítarlega fjölmörg dæmi um undarleg, hæpin, vafasöm og ámælisverð vinnubrögð fréttamanna. Í ljós kemur að fjölmiðlum veitir svo sannarlega ekki af því aðhaldi sem þeim er ætlað öðrum. 352 bls. 1.790 kr. (kilja). Panta.
		Heilræðavísur. Hallgrímur Pétursson og Anna Þóra Árnadóttir. Hinar sígildu Heilræðavísur Hallgríms Péturssonar með nýjum myndskreytingum Önnu Þóru Árnadóttur. Bókin er öll í lit og er hver vísa myndskreytt á einni opnu. Myndirnar lýsa þeim tilfinningum sem textinn vekur. Í myndskreytingunum eru notaðir akríllitir og blýantur. Heilræðakvæði voru vinsæl kveðskapargrein um daga Hallgríms Péturssonar (1614–1674). Þar gafst tækifæri til að koma á framfæri með skemmtilegum hætti, ekki síst til barna, nytsömum sannindum og góðum ráðum um sið og brag. Hallgrímur orti allmörg kvæði af þessu tagi og eru Heilræðavísur hans þeirra kunnust. Heilræðavísurnar hafa notið mikillar hylli, en segja má að þær lýsi flestu því sem verða má hverjum manni til gæfu og gengis. Einstaklega falleg bók sem ætti að vera til á hverju heimili. 28 bls. 2.490 kr. Panta.
		Í húsi listamanns. Jakob F. Ásgeirsson. Bókin hefur að geyma svipmyndir af sumum mætustu listamönnum og rithöfundum Íslendinga á 20. öld. Svipmyndirnar eru 25 og flestar með sama sniði: heimsókn til þjóðkunns listamanns þar sem reynt er í stuttu samtali að bregða upp skyndimynd af manninum og því sem hann er að fást við þá stundina, vinnubrögðum hans og afstöðu til lífs og listar. Samtalsþættir þessir birtust fyrst í Morgunblaðinu, flestir á árunum 1981–1982, og þeim fylgja einstakar portrettmyndir af viðmælendunum eftir ljósmyndara Morgunblaðsins. Viðmælendur Jakobs eru, í stafrófsröð: Agnar Þórðarson rithöfundur, Eggert Guðmundsson listmálari, Finnur Jónsson listmálari, Gísli J. Ástþórsson rithöfundur og teiknari, Guðbergur Bergsson rithöfundur, Helgi Sæmundsson skáld, Hjörleifur Sigurðsson listmálari, Jóhann Briem listmálari, Jóhannes Helgi rithöfundur, Jóhannes Jóhannesson listmálari, Jón Óskar skáld, Jón úr Vör skáld, Jónas Árnason rithöfundur, Kjartan Guðjónsson listmálari, Kristján Karlsson skáld, Kristmann Guðmundsson rithöfundur, Ólafur Jóhann Sigurðsson rithöfundur, Septem-hópurinn, Sigurður Sigurðsson listmálari, Sigurjón Ólafsson myndhöggvari, Snorri Hjartarson skáld, Steinþór Sigurðsson listmálari, Svavar Guðnason listmálari, Sveinn Björnsson listmálari og Valtýr Pétursson listmálari. 224 bls. 2.490 kr. Panta.
		Kristján Albertsson — Margs er að minnast. Jakob F. Ásgeirsson. Frásagnarsnilld Kristjáns Albertssonar var alkunn. Hann lifði söguríka tíma og hafði frá mörgu að segja. Jakob F. Ásgeirsson settist við fótskör Kristjáns í elli hans þegar sjónleysi varnaði honum ritstarfa. Úr samstarfi þeirra varð til þessi dýrlega minningabók. Kristján lýsir samtíð sinni– öld gleði og ljóma, harðneskju og ófriðar, framfara og ævintýra – og bregður upp ógleymanlegum svipmyndum af nokkrum samferðarmönnum sínum og vinum, svo sem Matthíasi Jochumssyni, Einari Benediktssyni, Jóhanni Sigurjónssyni, Jóhannesi Kjarval og Guðmundi Kamban. 1.490 kr. (kilja). Panta.