Fréttir frá Bókafélaginu Uglu 2008

Höfundur Bartimæusar-þríleiksins skrifar um Gretti
 
Breski metsöluhöfundurinn Jonathan Stroud hefur nýlega skrifað bók byggða á Grettissögu, að því er kemur fram á vefsíðu hans. Jonathan segist hafa valið þessa fjórtándu aldar íslensku sögu þegar bókaútgefandi bað hann að endursegja fræga hetjusögu. Hann segir að hinn sterki Grettir hafi sífellt verið að koma sér í vandræði vegna skapofsa síns. Bardaginn við drauginn Glám er einn af hápunktum sögunnar, að mati Jonathans. Bókin verður gefin út haustið 2009 hjá forlaginu Barrington Stoke sem sérhæfir sig í útgáfu bóka fyrir þá sem eru lesblindir eða eiga í erfiðleikum með lestur.

Jonathan Stroud er þekktastur fyrir Bartimæusar-þríleikinn, en þær bækur hafa verið gefnar út í um fjörutíu löndum og selst í milljónum eintaka. Bókafélagið Ugla hefur tryggt sér útgáfurétt á þessum bókum og sú fyrsta, Verndargripurinn frá Samarkand, kom út í haust. Morgunblaðið sagði frá því fyrir nokkrum árum að rætt hefði verið um þessa bókaröð sem arftaka Harry Potters. Blaðið sagði að sumir líktu bókunum við ferðir Gúllívers en aðrir teldu þær ádeilu á Tony Blair, en sögusviðið er London nútímans þar sem töframenn fara með völd.

Eftir áramótin kemur út ný bók eftir Jonathan Stroud í tólf löndum. Hún nefnist Heroes of the Valley og styðst að einhverju leyti við norræna goðafræði.

24.12.2008. mbl.is

„Ævintýrabók í lagi“
 
Þetta er fyrirsögnin á bókarumsögn í DV í dag. Þar skrifar Helga Magnúsdóttir um bókina Bartimæus I – Verndargripurinn frá Samarkand, sem Bókafélagið Ugla gefur út. Helga segir: „Þessi bók er virkilega skemmtileg og ekta ævintýrabók eins og þær gerast bestar. Næsta bók verður hluti af tilhlökkuninni fyrir næstu jól. Alvöru ævintýri þar sem allt getur gerst.“ Bókin fær 3,5 stjörnur af 5 mögulegum.

22.12.2008. dv.is

Þriðja prentun Pollýönnu
 
Svo mikil eftirspurn hefur verið eftir bókinni um Pollýönnu, sem Bókafélagið Ugla gefur út, að tvær fyrstu prentanirnar eru uppseldar. Sú þriðja er að koma úr prentun.

18.12.2008.

„Pollýönnu inn á hvert heimili“
 
Erla Hlynsdóttir blaðamaður segir á bloggsíðu sinni að bókin um Pollýönnu sé „algjör skyldulesning fyrir unga sem aldna. Sjaldan ef nokkurn tíman hefur boðskapur Pollýönnu átt jafn vel við.“ Hún segist hafa heillast af barnslegri einlægninni og flett „spennt frá einni síðunni yfir á þá næstu til að komast að því hvern Pollýanna myndi gleðja næst. Ég hreinlega krefst þess að ríkisstjórnin sjái til þess að koma Pollýönnu inn á hvert heimili.“

16.12.2008. 

Bókastríðið í algleymingi
 
Í tilefni af útkomu bókarinnar Þjóð í hafti er ástæða til að rifja það upp að um miðjan desember 1943 tilkynnti Viðskiptaráð að bókaútgefendum væri skylt að ákveða verð á bókum í samráði við verðlagsstjóra. Jafnframt skilgreyndi ráðið fasta álagningu bókaverslana. Verðlagsstjóri sagði í yfirlýsingu að ástandið á bókamarkaðinum hefði verið orðið þannig að ekki hefði lengur verið verjandi að láta það afskiptalaust.

Hagkaup reyndi að brjóta upp bóksölukerfið í byrjun desember 1980 með því að bjóða nýjar bækur með 10% afslætti en varð að hætta við afsláttinn skömmu síðar.

Bókastríð hófst svo fyrir fjórtán árum, í desember 1994, þegar Bónus fór að selja tíu vinsælustu bækurnar með 15% afslætti og jók síðan afsláttinn í 30%. Þá sagði þekktur bókaútgefandi að bókmenntir ættu ekki að lúta sömu markaðslögmálum og sykur og hveiti.

Nú er veittur afsláttur sem aldrei fyrr og ein verslun auglýsti nýlega: „Forseti á hálfvirði.“

15.12.2008.  amx.is

Agatha í Spennubókaklúbbi Eymundsson
 
Tvær nýjar bækur eftir Agöthu Christie, Spilin á borðið og Stefnumót við dauðann, eru á sérstöku inngöngutilboði í Spennubókaklúbbi Eymundsson. Slóð á klúbbinn er hér.

14.12.2008.

Þjóð í hafti komin í kilju
 
Þekkir þú sögu haftaáranna? Þegar öll verslun á Íslandi var hneppt í svo harðar viðjar að ekki mátti flytja bók til landsins án þess að biðja yfirvöld um leyfi? Þegar ávextir sáust ekki árum saman og fólk stóð næturlangt í biðröðum í von um að geta keypt sér eitt par af bomsum? Þegar menn voru fangelsaðir fyrir að reisa sér bílskúr í óþökk yfirvalda?

Haftatímabilið er jafnan talið standa frá 1930 til 1960 þegar viðreisn efnahagslífsins hófst í anda frjáls markaðsbúskapar. Í bókinni Þjóð í hafti segir Jakob F. Ásgeirsson sögu haftaáranna á einstaklega læsilegan hátt. Bókin kom fyrst út árið 1988 og hefur lengi verið ófáanleg. Hún er nú komin út í kilju, meðal annars til að minna stjórnvöld á að höft leysa ekki aðsteðjandi vanda í efnahagsmálum.

Umsögn um bókina er á Andríki og fyrsti kaflinn er birtur á Amx.is.

13.12.2008.

Bókafélagið Ugla með mest seldu barnabókina
 
Á nýjum lista yfir bóksölu 3.-9. desember hjá Eymundsson og Bókabúðum Máls og menningar er Pollýanna komin í 1. sæti yfir barna- og unglingabækur og í 4. sæti á metsölulista yfir allar bækur.

Bók Óla Björns Kárasonar, Stoðir FL bresta, er í 2. sæti á lista um handbækur, fræðibækur og ævisögur og í 8. sæti á heildarlista um mest seldu bækur í öllum flokkum.

Í samantekt Félagsvísindastofnunar fyrir Morgunblaðið um bóksölu 1.-7. desember er Gunnar Dal Ljóðasafn í 6. sæti á lista yfir íslensk og þýdd ljóð.
 
10.12.2008.

Vísindamenn staðfesta lífsspeki Pollýönnu
 
Vísindamenn við Harvard-háskóla í Boston og háskólann í San Diego í Kaliforníu hafa sýnt fram á að jákvæðni og bjartsýni sé smitandi. CNN fréttastofan segir frá þessu á vefsíðu sinni.

Í grein sem birt er í hinu virta læknatímariti British Medical Journal kemur fram að sá sem horfir á hinar björtu hliðar tilverunnar auki um 15% líkurnar á því að vinur hans geri slíkt hið sama, hjá vinum þess vinar aukast líkurnar um 10% og í „þriðja lið“ aukast þær um 7%. Niðurstöðurnar eru byggðar á hinni viðamiklu Framingham-rannsókn.

Segja má að hér sé komin sönnun á lífsspeki Pollýönnu og einnig að Einar Benediktsson hafi haft nokkuð til síns máls þegar hann sagði: Eitt bros getur dimmu í dagsljós breytt.

08.12.2008. amx.is

Mikið fjallað um bók Óla Björns
 
Bók Óla Björns Kárasonar, Stoðir FL bresta, hefur verið mikið til umræðu í fjölmiðlum síðustu daga. Meðal annars má benda á viðtal við höfundinn  í Silfri Egils á sunnudaginn og ritdóm Björns Bjarnasonar á vefsíðu sinni.

08.12.2008.

Nýtt hefti Þjóðmála

Áskrifendur Þjóðmála fengu vetrarhefti tímaritsins í pósti í dag. Efnið er mjög fjölbreytt að vanda, en efnahagsþrengingar síðustu mánaða setja mark sitt á efnisvalið (sjá hér). Lengsta greinin er eftir Hannes Hólmstein Gissurarson og fjallar um dvöl rúmlega tuttugu vinstri sinnaðra Íslendinga í leyniskólum í Moskvu.

08.12.2008.

Önnur prentun Pollýönnu komin
 
Nú getur Bókafélagið Ugla farið að dreifa Pollýönnu til verslana á ný, en bókin seldist upp fyrir nokkrum dögum. Ný prentun bókarinnar er komin frá Prentsmiðjunni Odda.

08.12.2008.

Gríðarlega vel skrifuð bók
 
Hinn mikli Gatsby eftir F. Scott Fitzgerald er til umfjöllunar í Lesbók Morgunblaðsins í dag, en bókin kom út í haust hjá Bókafélaginu Uglu í þýðingu Atla Magnússonar. „Sagt hefur verið að bókin sé vinsælasta nútímaskáldsagan í bandarískum bókmenntum,“ stendur í Lesbókinni. „Bókin um Gatsby, manninn sem reynir að endurlífga fortíðina, er gríðarlega vel skrifuð í fallegum, fáguðum og angurværum stíl.“

06.12.2008.

Hin fullkomna bjartsýnissaga
 
Kolbrún Bergþórsdóttir skrifar langan dóm um Pollýönnu í Lesbók Morgunblaðsins í dag. „Auðvitað væri bókin um Pollýönnu ekki orðin klassísk nema vegna þess að lesendur hafa kolfallið fyrir henni,“ segir Kolbrún. „En fyrst og fremst er Pollýanna einstaklega skemmtileg bók, lipurlega skrifuð og full af áhugaverðum persónum ... Pollýanna er hin fullkomna bjartsýnissaga.“

06.12.2008.

Bók um FL Group komin út
 
Óli Björn Kárason blaðamaður hefur samið bók um hið umtalaða félag FL Group, sem nú heitir Stoðir og er komið í greiðslustöðvun. Bókin heitir Stoðir FL bresta og Bókafélagið Ugla gefur hana út. Framan á kápu stendur: „Þeir virtust vera töframenn sem kunnu áður óþekkta galdra í alþjóðlegum viðskiptum. Galdurinn reyndist spilaborg.“

04.12.2008.

Pollýanna komin í fjórða sæti og uppseld
 
Bókin um Pollýönnu, sem Bókafélagið Ugla gaf út um miðjan nóvember, er komin í fjórða sæti á aðallista Eymundsson yfir mest seldu bækur í síðustu viku, lista þar sem Arnaldrur Indriðason trónir í fyrsta sæti. Og Morgunblaðið sagði frá því á forsíðu í dag að Pollýanna væri uppseld hjá útgefanda en ný prentun væri væntanleg.

03.12.2008.

Gerður hrifin af ljóðum Gunnars
 
Gerður Unndórsdóttir á Egilsstöðum, móðir Sigmars Vilhjálmssonar útvarpsmanns, sagði frá því í þættinum Simmi og Jói á Bylgjunni í morgun að hún hefði verið svo spennt fyrir ljóðasafni Gunnars Dal (sjá hér) að hún hefði pantað bókina í póstkröfu að sunnan. Gerður las tvö ljóð úr bókinni, Auður og fátækt (bls. 130) og Ofurmennið (bls. 470). Upptaka er hér.

29.11.2008.

Þjóð í hafti
 
Bókin Þjóð í hafti eftir Jakob F. Ásgeirsson verður endurútgefin í desember. Bókin var gefin út árið 1988 og fjallar um þrjátíu ára haftatímabil í sögu þjóðarinnar. Hún hefur verið ófáanleg um árabil. Þorsteinn Pálsson ritstjóri vitnaði í efni bókarinnar í forystugrein Fréttablaðsins í dag.

29.11.2008.

Gatsby og Pollýanna í Kiljunni
 
Hinn mikli Gatsby fékk einstaklega góða dóma í Kiljunni í kvöld. Egill Helgason sagði: „Ein af hinum stóru bókum heimsins ... Fín útgáfa og fín þýðing.“ Kolbrún tók undir þetta og sagði: „Þessi bók er náttúrulega að fara bara í jólapakkana.“ Og Páll Baldvin Baldvinsson bætti um betur: „Glæsilegt verk.“ Þess má geta að Atli Magnússon þýddi bókina. Kolbrún fjallaði einnig um Pollýönnu og sagði: „Pollýanna, þetta er yndisleg bók.“

26.11.2008.

Gunnar Dal í fimmta sæti
 
Á bóksölulista sem Morgunblaðið birtir í dag er Gunnar Dal Ljóðasafn í fimmta sæti yfir ljóðabækur. Bókin hefur vakið mikla athygli og ekki síður viðtalið við Gunnar í Kastljósi.

26.11.2008.

Stefnumót við dauðann komin á metsölulista
 
Stefnumót við dauðann eftir Agöthu Christie er í 3. sæti á metsölulista Eymundsson og Bókabúða Máls og menningar yfir skáldverk í kilju dagana 12.-18. nóvember og aftur 19.-25. nóvember. Bókafélagið Ugla gaf bókina út í byrjun nóvember og einnig aðra spennubók eftir sama höfund, Spilin á borðið. Ragnar Jónasson þýddi báðar bækurnar. Umsögn Kolbrúnar Bergþórsdóttur um bækurnar er hér.

26.11.2008.

Arftaki Harry Potter: Hrikalega skemmtileg bók
 
Guðríður Haraldsdóttir aðstoðarritstjóri Vikunnar segir á bloggi sínu í dag að hún sé „búin að finna arftaka Harry Potters ... Bókaútgáfan Ugla sendi mér bækur í gær (m.a. Pollýönnu) en ein þeirra var þykk og girnileg unglingabók, sú fyrsta í þríleik, og fjallar um anda sem ungur töframaður (lærlingur) galdrar til sín og lætur (andann) stela hálsmeni frá töframanni sem hafði niðurlægt strákinn á viðurstyggilegan hátt. Þrátt fyrir viðfangsefnið er bókin engin stæling á Harry Potter, bara hrikalega skemmtileg og heilar 440 bls. sem ætti að gleðja sanna bókaorma. Vona að ég vaxi aldrei upp úr ævintýrabókum, það er gæðastimpill á þær þegar foreldrarnir ræna þeim af börnum sínum. Þessi bók heitir Bartimæus I – Verndargripurinn frá Samarkand sem ætti að vera í höndum sem flestra.“ Guðríður fjallar einnig um bókina í Vikunni og segir þar: „Þessi bók er hrikalega spennandi og skemmtileg, t.d. eru undirmálsgreinar, þar sem hinn fyndni og klári Bartimæus útskýrir hlutina á sinn hátt, algjör snilld. Þessi fyrsta bók í þríleiknum um Bartimæus lofar mjög góðu og án efa eiga foreldrar eftir að stelast í hana ... eins og við gerðum öll með Harry Potter-bækurnar.“
26.11.2008.

Pollýanna: Tímabær lesning á erfiðum tímum
 
Pollýanna, ein vinsælasta barnabók allra tíma, er komin út hjá Bókafélaginu Uglu. Bókin fjallar um unga stúlku sem er alltaf glöð, hvað sem á dynur. Bjartsýni Pollýönnu og gleði smitar út frá sér og hefur undraverð áhrif á alla sem umgangast hana. Bókin, sem er eftir bandaríska barnabókahöfundinn Eleanor H. Porter, kom fyrst út hér á landi árið 1945 í afbragðsþýðingu Freysteins Gunnarssonar skólastjóra Kennaraskólans og hefur verið ófáanleg í nær tvo áratugi. Hún á fullt erindi við íslenska lesendur nú á þessum erfiðleikatímum, þegar meiri þörf er á bjartsýni og jákvæðni en nokkru sinni fyrr. Ákvörðun um útgáfuna var tekin fyrir tæpum mánuði, eftir að bankakreppan skall á. Afkomendur Freysteins tóku mjög vel í hugmyndina og prentsmiðjan Oddi prentaði bókina á mettíma. Í ritdómi árið 1987 sagði séra Sigurður Haukur Guðjónsson að bókin um Pollýönnu tjái „lífssannleik sem er lykill að hamingjunni er við þráum öll, þeirri að finna sátt við eigið líf“. Hann sagði að sagan væri frábærlega vel skrifuð, hjartnæm og hlý „svo að öldungi féllu tár um vanga af gleði“. Sigurður Haukur sagði að þetta væri afburðabók „sem ætti að vera í höndum sem flestra“.  

20.11.2008.

Morgunblaðið, 20.11.2008: Góður boðskapur sem á alltaf erindi. »

Leikhúsgestir fengu bókavinninga
 
Nokkrir gestir á sýningu Leikfélags Akureyrar á Músagildrunni um síðustu helgi voru dregnir út í happdrætti þar sem vinningarnir voru bækurnar Spilin á borðið og Stefnumót við dauðann eftir Agöthu Christie, sem Bókafélagið Ugla gaf út í haust. Frétt Leikfélagsins er hér.  

19.11.2008.

Þægileg spenna og prýðisgóð afþreying
 
Kolbrún Bergþórsdóttir skrifar mjög vinsamlegan dóm í Lesbók Morgunblaðsins í dag um Spilin á borðið og Stefnumót við dauðann eftir Agöthu Christie, sem Bókafélagið Ugla gaf út í haust.  Fyrirsögnin er: „Þægileg spenna.“ Í lokin segir hún um Agöthu: „Í bókum sínum skapar hún gamaldags, þægilegan heim sem raskar ekki ró nokkurs manns. Lesendur vita í upphafi nokkurn veginn hvað bíður þeirra: Morð, rannsókn og óvænt endalok. Semsagt prýðisgóð afþreying.“ Umsögn Kolbrúnar er hér í heild á pdf-formi.  

15.11.2008.

Bók um fiskveiðistjórnunarkerfið er komin út
 
Bókafélagið Ugla og RSE hafa gefið út bókina Advances in Rights Based Fishing sem fjallar um eignarréttarbundna fiskveiðistjórnun. Þetta eru rutgerðir byggðar á fyrirlestrum sem fluttir voru á ráðstefnu RSE í ágúst 2006. Ragnar Árnason, einn af ritstjórum bókarinnar, afhenti Einari K. Guðfinnssyni sjávarútvegsráðherra, eintak af bókinni (sjá mynd).

15.11.2008.

Langt viðtal við Gunnar Dal í Kastljósi
 
Í Kastljósi Sjónvarpsins í kvöld birtist viðtal Jóhönnu Vilhjálmsdóttur við Gunnar Dal rithöfund og heimspeking í tilefni að útgáfu Bókafélagsins Uglu á ljóðasafni hans. Viðtalið var tekið upp á Kaffi París, þar sem Gunnar er tíður gestur. Rætt var um ljóðagerð hans, lífið og tilveruna og einnig um þá erfiðleika sem þjóðin stendur frammi fyrir. Gunnar virtist bjartsýnn á framtíð Íslendinga. Fyrst um sinn er hægt að horfa á viðtalið hér. Lesa má nánar um ljóðasafnið hér.

11.11.2008.

Ruv.is, 11.11.2008: Dagskrárkynning ... »
Eiríkur Jónsson, DV.is, 11.11.2008: Sendum Gunnar til Bessastaða ... »
Lára Hanna Einarsdóttir, Blog.is, 11.11.2008: Myndband af viðtalinu ... »
Páll Höskuldsson, Blog.is, 11.11.2008: Nýtt Ísland ... »
H-4, Blog.is, 11.11.2008: Verum góð ... »
Hildur Guðlaugsdóttir, 123.is, 12.11.2008: Landamæri hins ríka manns ... »
Katrín S. Baldursdóttir, Blog.is, 12.11.2008: Landamæri ríka mannsins ... »
Hallgrímur Óskarsson, Blog.is, 12.11.2008: Þrælar fjármagnsins ... »
Hrafn Andrés Harðarson, Blog.is, 13.11.2008: Mikið eigum við gott ... »

Tvær spennusögur eftir Agöthu Christie
 
Bókafélagið Ugla hefur gefið út tvær bækur eftir drottningu sakamálasagnanna, Agöthu Christie. Spilin á borðið (Cards on the Table) kom út á frummálinu árið 1936 en kemur nú út í íslenskri þýðingu í fyrsta sinn. Herra Shaitana safnar fólki sem hefur komist upp með morð. Hann býður Hercule Poirot í heimsókn en áður en kvöldið er á enda hefur einn „safngripanna“ myrt gestgjafann. Fjórir liggja undir grun – og Poirot stendur frammi fyrir einni af sínum erfiðustu ráðgátum. Spilin á borðið er 270 bls. Stefnumót við dauðann (Appointment with Death) hefur áður komið út í íslenskri þýðingu undir heitinu „Feigðarför“. Illgjörn bandarísk ekkja finnst látin í hinni fornu borg Petra í Landinu helga. Margir vildu hana feiga en örlítið far eftir sprautunál er eina vísbendingin um að hún hafi ekki dáið eðlilegum dauðdaga. Hercule Poirot tekur að sér að komast að hinu sanna innan sólarhrings. Stefnumót við dauðann er 240 bls. Ragnar Jónasson þýddi báðar bækurnar.

05.11.2008.

Ný bók eftir Patriciu Cornwell
 
Bókafélagið Ugla hefur gefið út bókina Blóðreiturinn eftir einn vinsælasta spennusagnahöfund heims, Patriciu Cornwell. Jólahátíðin hefur sjaldan reynst Kay Scarpetta góður tími. Þá fara ofbeldismenn gjarnan á stjá og það þýðir útkall hjá yfirréttarmeinafræðingnum í Virginíu og greinanda hjá FBI, bandarísku alríkislögreglunni. Um þessi jól finnst nakið lík af ungri konu, sem enginn veit hver er, á skuggalegum stað í Central Park í New York. Líkinu hefur verið stillt upp við gosbrunn. Allt bendir til þess að sadískur raðmorðingi sé aftur kominn á kreik. Aldrei hefur reynt meira á Kay Scarpetta og samstarfsmenn hennar en í þessari æsilegu leit að siðblindum brjálæðingi sem er með Kay á heilanum. Blóðreiturinn er 360 bls. Atli Magnússon þýddi bókina.

05.11.2008.

Ljóðasafn Gunnars Dal komið út
 
Nú er verið að dreifa í bókaverslanir ljóðasafni Gunnars Dal, en það er gefið út í tilefni af 85 ára afmæli þessa skálds og heimspekings. Safnið geymir allar fimmtán ljóðabækur hans og auk þess eina nýja sem nefnist „Það ert þú“. Fyrsta ljóðabók Gunnars kom út árið 1949 og er hann með afkastamestu skáldum þjóðarinnar. Í bókinni eru birtar tvær ritgerðir um ljóðagerð Gunnars eftir Jóhannes Helga og Ólaf Hauk Árnason. Þar kemst Jóhannes Helgi m.a. svo að orði að áleitin ljóð Gunnars beri vott um agaða listgáfu, blæbrigðaríkt tilfinningalíf og virðingu fyrir lífinu. Bókin er 576 bls. Lesa má nánar um ljóðasafnið hér.

19.10.2008.

Styttist í jólabækurnar
 
Allar bækur Bókafélagsins Uglu eru nú komnar í prentun. Útgáfubækurnar í ár eru fimmtán og verða þær kynntar á næstu vikum. Framhald verður á útgáfu þýddra skáldsagna og einnig eru á jólalistanum bækur sem fjalla um þjóðfélagsmál og ljóðasafn. Sjá hér.
 
16.10.2008.

Allt að 20% afsláttur ef keypt er á vefsíðunni
 
Nú hefur verið ákveðið að bjóða bækur til sölu hér á vefsíðunni á einstaklega góðum kjörum. Veittur er 10% afsláttur og heimsending er ókeypis. Ef keypt er fyrir 10.000 krónur eða meira er afslátturinn 20% (sjá nánar hér). Fljótlega verða kynnt mánaðartilboð á völdum bókum.
 
04.10.2008.

Biblía sem nútímafólk kann að meta
 
Biblían á 100 mínútum, sem Bókafélagið Ugla gaf út fyrir tveimur árum, hefur svo sannarlega slegið í gegn. Bókin seldist upp en hefur nú verið endurprentuð. Biblían er nú einnig fáanleg sem hljóðbók, en lesari er Sigurður Skúlason leikari. Í formála bókarinnar segist Karl Sigurbjörnsson biskup Íslands fagna útgáfunni og telur hana skemmtilegt og handhægt yfirlit sem „gefur glögga innsýn í meginstef Biblíunnar og handhægan leiðarþráð til að rata gegnum hana“. Hægt er að panta bækurnar hér.
 
04.10.2008.

Fyrstu þrjár barnabækurnar frá Uglu
 
Nýlega gaf Bókafélagið Ugla út sínar fyrstu barnabækur. Þetta eru Ella Bella ballerína eftir James Mayhew, Gleym mér ei eftir Michael Broad og Ljósálfavinkonur eftir Penny Dann. Allir eru þessir rithöfundar breskir og myndskreyta bækur sínar sjálfir. Hver bók kostar aðeins 2.490 krónur (2.240 krónur með 10% afslætti).
 
28.09.2008.

Sautján bækur á síðasta ári
 
Bókafélagið Ugla gaf út sautján bækur á árinu 2007, auk fjögurra hefta af tímaritinu Þjóðmálum. Skrá um bækurnar, með nánari upplýsingum, má sjá hér.
 
27.09.2008.