Ásgeir Jakobsson

Ásgeir Jakobsson (1919-1996) fæddist í Bolungavík og fór ungur til sjós. Hann var sjómaður í sextán ár og Stýrimannaskólalærður, en fór í land árið 1947 og gerðist bóksali á Akureyri. Hann rak Bókabúð Rikku til 1964 en flutti þá suður til Reykjavíkur og tók að skrifa bækur. Alls sendi hann frá sér 21 bók á þrjátíu árum. Meðfram bókagerð sinni skrifaði Ásgeir mikið í blöð og mátti heita fastur dálkahöfundur við Morgunblaðið um aldarfjórðungs skeið. Í sagnagerð sinni um útgerðarmenn og sjómenn, sem jafnframt eru almennar heimildarsögur um íslenskan sjávarútveg, spannaði Ásgeir Jakobsson heildarsögu sjósóknar og útgerðar í þessu landi frá fyrstu tíð til loka 20. aldar.

Bækur eftir Ásgeir Jakobsson

1965: Sigling fyrir Núpa. Sjómannasaga. Ásamt Torfa H. Halldórssyni.
1966: Kastað í Flóanum. Togarasaga.
1967: Einn í lofti, einn á sjó. Ævisaga Francis Chichester.
1968: Hart í stjór. Ævisaga Júlíusar Júliníusarsonar.
1971: Fiskimaðurinn. Handbók í sjómennsku.
1972: Um borð í Sigurði. Og nokkrir Grímsbæjarþættir.
1976: Byrjendabók í siglingafræði. Ásamt Jónasi Sigurðssyni.
1978: Einars saga Guðfinnssonar. Ævisaga.
1979: Tryggva saga Ófeigssonar. Ævisaga.
1980: Gríms saga trollaraskálds. Heimildarskáldsaga.
1981: Hinn sæli morgunn. Skáldsaga.
1984: Lífið er lotterí. Saga af Aðalsteini Jónssyni og Alla ríka.
1987: Fanginn og dómarinn. Þáttur af Sigurði skurði og Skúla sýslumanni.
1987: Hafnarfjarðarjarlinn. Einars saga Þorgilssonar.
1988: Siglingasaga Sjómannadagsráðs.
1988: Þórður kakali. Ævisaga.
1989: Sagan gleymir engum. Sjómennskuþættir.
1990: Bíldudalskóngurinn. Athafnasaga Péturs J. Thorsteinssonar.
1991: Sögur úr týndu landi. Smásögur.
1994: Óskars saga Halldórssonar. Íslandsbersi.
1995: Pétur sjómaður. Péturs saga Sigurðssonar.
2001: Fiskleysisguðinn. Greinasafn.
Auk þess nokkrir bæklingar og allmargar þýddar bækur, þ. á m.
Botnvarpan og búnaður hennar (1973).

Úr nokkrum ritdómum um bækur Ásgeirs Jakobssonar

„Mikið má vera, ef Einars saga Ásgeirs Jakobssonar á ekki eftir að komast í hóp þeirra fáu stóru.“
Helgi Skúli Kjartansson um Einars sögu Guðfinnssonar (1978).

„ ... geysilega fróðleg og fjörleg bók, skrifuð á safaríku og kjarnyrtu máli ...“
Hrafn Jökulsson um Óskars sögu Halldórssonar (1995).

„Þessi skáldsaga er sérstæð og kostuleg ... Persónur eru sumar ljóslifandi og undir lokin tekst skáldinu þannig upp að heita má snilli.“
Guðmundur G. Hagalín um Hinn sæla morgunn (1981).

„Bókin er þannig rituð, að hún ætti að geta orðið nokkur skemmtilestur hverjum sem er, þótt ekki væri fyrir annað en málfarið, sem bæði er myndrænt, mjög svo persónulegt og óvenju hispurslaust ...“
Eiríkur Hreinn Finnbogason um Kastað í Flóanum (1966).

„Ásgeir Jakobsson hefur hér fyllt opið skarð í útgerðarsögu Íslendinga.“
Halldór Kristjánsson frá Kirkjubóli um Bíldudalskónginn (1990).

„ ... afbragðs vel rituð, sögð á lifandi og kjarnyrtu sjómannamáli ... Þessi bók er tvímælalaust merkust og íslenskust þeirra nýju skáldsagna sem ég hef lesið í vetur.“
Jón Þ. Þór um Gríms sögu trollaraskálds (1980).

„Mikið líf er í þessum sögum Ásgeirs Jakobssonar ... afar góður skáldskapur.“
Erlendur Jónsson um Sögur úr týndu landi (1991).

„ ... náma af fróðleik um íslenskan sjávarútveg, einkum togaraútgerð, togaralíf og togaramenn ... rituð af ágætum stílþrótti.“
Helgi Skúli Kjartansson um Tryggva sögu Ófeigssonar (1979).
 

		Fiskleysisguðinn. Ásgeir Jakobsson. Um tuttugu ára skeið gagnrýndi Ásgeir Jakobsson, rithöfundur, fiskveiðiráðgjöf Hafrannsóknastofnunar í snjöllum ádeilugreinum sem birtust í Morgunblaðinu. Hann taldi fiskifræðinga ekki búa yfir nægilegri þekkingu á lífríki sjávar til að fara í stjórnunarleik með fiskveiðarnar. Hann benti á þá sögulegu staðreynd að íslensk fiskislóð þarfnaðist jafnrar og góðrar grisjunar. Þannig fengist af henni jafnbesti aflinn og ekki minna en 400 þúsund tonn árlega af þorski. Hafrannsókn hefði tekið skakkan pól í hæðina og stjórnað þorstofninum í felli. Þrjátíu ára samdráttar- og friðunarstjórn Hafrannsóknar hefði haft af þjóðinni ekki minna 200 milljarða í gjaldeyristekjur. Hér er þessum greinum Ásgeirs Jakobssonar safnað á bók sem óhætt er að segja að eigi beint erindi í þá umræðu sem óhjákvæmilega er í vændum þegar æ fleiri eru að vakna til vitundar um að ekki er allt með felldu í fiskveiðiráðgjöf Hafrannsóknastofnunar. 1.490 kr. Panta.
		Kastað í Flóanum. Ásgeir Jakobsson.   Í tilefni af því að 100 ár eru frá upphafi íslenskrar togaraútgerðar kemur bók Ásgeirs Jakobssonar, Kastað í Flóanum, nú út í endurskoðaðri gerð. Í bókinni er rakin sagan af upphafi togveiða við Ísland og útgerð Coots, fyrsta íslenska togarans. Brugðið er upp lifandi mannlýsingum af þeim sem við sögu koma. Stórfróðleg og bráðskemmtileg lýsing á aldarfari á Íslandi þegar stigin voru fyrstu skrefin í mestu atvinnubyltingu Íslandssögunnar. 287 bls. 1.490 kr. (kilja). Panta.

Bækur Ásgeirs Jakobssonar um íslenskan sjávarútveg eru á kjarnyrtu máli.