Jakob F. Ásgeirsson

Jakob F. Ásgeirsson (f. 1961) er M.A. í heimspeki, stjórnmálafræði og hagfræði (P.P.E.) frá Pembroke College, Oxford, og M.Litt. í stjórnmálafræði frá Oxford-háskóla. Jakob hefur unnið við ritstörf, blaðamennsku og bókaútgáfu. Aung San Suu Kyi er hans tíunda bók. Áður hefur hann sent frá sér þrjár ævisögur – um Alfreð Elíasson flugmann og forstjóra Loftleiða, Pétur Benediktsson sendiherra og bankastjóra og Valtý Stefánsson ritstjóra Morgunblaðsins; þrjú sagnfræðiverk – um haftaárin á Íslandi, ljósmyndabók um sögu 20. aldarinnar á Íslandi og yfirlit um framkvæmdir Stjórnarráðs Íslands á árunum 1991–2004; safn greina um þjóðmál frá árunum 1998–2004; svipmyndir af listamönnum og rithöfundum; og samtalsbók við Kristján Albertsson rithöfund. Jakob er ritstjóri og útgefandi tímaritsins Þjóðmála sem hóf göngu sína haustið 2005.
 

Þjóð í hafti. Jakob F. Ásgeirsson. Þekkir þú sögu haftaáranna? Þegar öll verslun á Íslandi var hneppt í svo harðar viðjar að ekki mátti flytja bók til landsins án þess að biðja yfirvöld um leyfi? Þegar ávextir sáust ekki árum saman og fólk stóð næturlangt í biðröðum í von um að geta keypt sér eitt par af bomsum? Þegar innflutningsleyfi fyrir bílum gengu kaupum og sölum fyrir hærra verð en sjálfur bíllinn kostaði? Þegar menn voru fangelsaðir fyrir að reisa sér bílskúr í óþökk yfirvalda? Þegar ríkið rak prentsmiðju og vélsmiðju og setti á fót ótal einkasölur – viðtækjaeinkasölu, bifreiðaeinkasölu, raftækjaeinkasölu og grænmetiseinkasölu? Þegar pólitísk spilling grasséraði, smygl og svartamarkaður – og voldug hagsmunasamtök risu upp úr öllum áttum til að tryggja hlut sinn í haftakerfinu? Haftatímabilið er jafnan talið standa frá 1930 til 1960 þegar viðreisn efnahagslífsins hófst í anda frjáls markaðsbúskapar. Í þessari bók segir Jakob F. Ásgeirsson sögu haftaáranna á einstaklega læsilegan hátt. Bókin kom fyrst út árið 1988 og hefur lengi verið ófáanleg. 380 bls. 1.990 kr. (kilja). Panta.

Bækur eftir Jakob F. Ásgeirsson

1984: Alfreðs saga og Loftleiða. (2. útg. 1985.)
1986: Kristján Albertsson. Margs er að minnast.  (2. útg. 2006.) »
1988: Þjóð í hafti.  (2. útg. 2008.) »
1998: Pétur Ben.
2000: 20. öldin. Brot úr sögu þjóðar.
2003: Valtýr Stefánsson. Ritstjóri Morgunblaðsins.
2004: Til móts við nýja öld. Stjórnarráð Íslands 1964-2004, 3. bindi.
2005: Frá mínum bæjardyrum séð. »
2006: Í húsi listamanns. » 

Bækur sem Jakob F. Ásgeirsson hefur þýtt

2005: Kommúnisminn (ásamt Margréti Gunnarsdóttur). »
2006: Biblían á 100 mínútum. »
2007: Látum slag standa (ásamt Margréti Gunnarsdóttur). »
 

Jakob F. Ásgeirsson rithöfundur.