Þorkell Sigurlaugsson

Þorkell Sigurlaugsson, höfundur Nýrrar framtíðarsýnar, er framkvæmdastjóri fjármála- og þróunarsviðs Háskólans í Reykjavík (HR). Hann hefur gegnt lykilhlutverki við þróun og uppbyggingu HR frá því hann hóf þar störf árið 2004. Þorkell lauk prófi í viðskiptafræði frá Háskóla Íslands árið 1977. Hann starfaði hjá Eimskipafélagi Íslands að loknu námi, lengst af sem framkvæmdastjóri og síðan framkvæmdastjóri hjá Burðarási, sem var hlutabréfasjóður í eigu Eimskips. Í framkvæmdastjóratíð Þorkels urðu umtalsverðar breytingar á Eimskipafélaginu. Það var lengi eitt öflugasta fyrirtæki landsmanna og í fremstu röð á ýmsum sviðum.

Þorkell hefur setið í stjórnum um tuttugu fyrirtækja, meðal annars Marels, Össurar, TM Software (áður TölvuMynda) og Kauphallar Íslands svo tekin séu dæmi um nokkur stærri fyrirtæki, auk þess að sinna ýmsum félagsstörfum. Þorkell hefur ritað fjölda greina í blöð og tímarit, einkum um stjórnunarmál og er höfundur nokkurra bóka.

Þorkell er kvæntur Kristínu H. Vignisdóttur og eiga þau þrjú börn.

Bækur eftir Þorkel Sigurlaugsson:
Framtíðarsýn, 1989.
Frá handafli til hugvits, 1993.
Stefnumarkandi áætlanagerð, 1994.
Stjórnlist, 1995.
Ný stjórnlist, 1996.
Stjórnun breytinga, 1996.
Ný framtíðarsýn, 2009.
 
 

Ný framtíðarsýn. Þorkell Sigurlaugsson. Í þessari bók fjallar Þorkell um nauðsyn þess að þjóðin móti sér nýja framtíðarsýn við endurreisn efnahagslífsins þar sem nýir stjórnarhættir, bætt viðskiptasiðferði, sjálfbærni og nýsköpun eru höfð að leiðarljósi. Fjallað er ítarlega um stjórnun fyrirtækja, einkum hlutverk stjórna, stjórnarhætti stjórna og æðstu stjórnenda. Þorkell telur brýnt að innleiða ný gildi við stjórnun fyrirtækja og endurvekja gömul gildi sem hundsuð voru í fífldirfsku og hrunadansi síðustu ára. Efnahagsleg umgjörð, eftirlitskerfi ríkisvaldsins og ný framtíðarsýn stjórnvalda, fyrirtækja og einstaklinga skipta höfuðmáli í þeirri uppbyggingu sem framundan er. Það er boðskapur bókarinnar að ástæða sé til bjartsýni ef rétt sé á málum haldið því Ísland er enn land stórkostlegra tækifæra. Þá þarf að byggja upp alþjóðlegt samstarf og frjáls markaðshagkerfi en forðast einangrunarstefnu, ríkisforsjá og haftastefnu. Ný framtíðarsýn er mikilvægt framlag til umræðunnar um endurreisn atvinnulífsins og uppgjörs við þá sem komu bankakerfinu, mörgum öflugustu fyrirtækjum landsmanna og þúsunda landsmanna í fjárhagslegt þrot. 208 bls., innbundin. 4.490 kr. Tilboðsverð 3.790 kr. Panta.

Þorkell Sigurlaugsson